Nagpagwa sang statement ang Police Regional Office 6 nga ang pagserbe sang Warrant of Arrest sa Communist Terrorist Group sa banwa sang Calatrava ang nagdangat sa isa ka encounter.
Suno sa PRO 6, ang joint element sang 79th Infantry Battalion, Philippine Army, 6th Special Action Battalion, 1st Negros Occidental Provincial Mobile Force Company kag Calatrava Municipal Police Station ang nagserbe sang warrant of arrest sa miyembro sang CTG sa Sitio Ikugan, Brgy. Minapasok, Calatrava, Negros Occidental.
Sa pagserbe sang warrant of arrest kay Darry Dayawan, Charity Amacan kag iban pa, nagluntad ang pagbayluhanay sang lupok sa tunga sang pwersa sang gobyerno kag CTG nagresulta sa pagkapatay ni Police Corporal Jaime Nuñez kag pilason ang deputy chief of police nga si Police Capt. Jesus Alba kag Police Corporal Dennis Nasis.
Ang warrant of arrest para kay Darry Dayawan kag iban pa amo ang kaso sa pagpamatay samtang ang warrant of arrest naman kay Charity Amacan kag iban pa amo ang pagbayolar sa RA 9516.
Hugot nga ginkondenar sang PRO6 ang CTG nga indi makabato sang patas sa pwersa sang gobyerno.
Suno kay PBGen Sidney N. Villaflor, regional director sang PRO6, ang pagserbe sang Warrant of Arrest sa Communist Terrorist Group ang nagdangat sa isa ka encounter.
Kag ginkasubo sini ang pagakapatay ni Police Corporal Nunez kag pagka-injure nanday Police Capt. Alba kag Police Corporal Nasis nga nagperform sang ila trabaho agud maghatag sang hustisya sa mag-tiyo nga sanday Felix kag Eliseo Resutai.
Gina-ingganyo sini ang tanan nga magbulig sa pagbato batok sa terrorismo, para sa katawhayan sang pamilya kag sang pungsod.
