Nagdangat sa P25.6 million ang balor sang illegal nga droga nga nakumpiskar sa tatlo ka semana nga anti-illegal drugs operation sa bilog nga Western Visayas halin Disyembre 15, 2024 tubtob Enero 5, 2025.
Sa interview sang Bombo Radyo Bacolod kay Police Regional Office 6 spokesperson Police Lt. Col. Arnel Solis, sa kabug-usan, ginabanta nagadangat sa 3,768 grams ang nakumpiskar nga illegal nga droga, paagi sa 95 ka police operations kun sa diin 140 ang naaresto.
Sa P25.6 million nga balor sang nakumpiskar nga illegal nga droga, P16.5 million diri ang nakumpiskar sang Bacolod City Police Office.
Ang BCPO man ang may pinakamadamo nga naaresto nga nagdangat sa 46 ka drug suspects samtang 43 naman ang naaresto sang Negros Occidental Police Provincial Office.
Kasunod sa BCPO, ang Iloilo City Police Office ang ikaduha sa may pinakamadamo nga nakumpiskar nga illegal nga droga nga nagdangat sa P6.5 million; kag Iloilo Police Provincial Office nga nakakumpiskar sang P1.8 million.
Suno kay Solis, ini ang nagapakita nga apisar sa mga aktibidad kaangay sang Paskwa kag bag-ong tuig, ang mga kapulisan ang wala nagpabaya sa anti-illegal drug campaign.
Magluwas diri, padayun man ang effort sang kapulisan batok sa wanted persons, illegal gambling kag iban pa.
