Naangkon sang Police Regional Office 6 personnel ang bulawan nga medalya sa patag sang Karatedo sa ginpatigayon nga 2022 World Police and Fire Games sa Rotterdam, Netherlands.
Suno kay P/Executive Master Sgt Junel Perania, nga nagaserbe nga playing-coach sa Karate sang Philippine Team nga subong na ang ulihi nila nga adlaw sa Rotterdam, Netherlands kun sa diin sila ang nag-abot sa pungsod sang Hulyo 21 samtang sang Hulyo 22 naman ang opening sang pahampang.
Pahayag sini nga masobra 100 ang Philippine National Police (PNP) personnel nga ginpadala para sa kompetisyon kun sa diin siya lang ang nagaisahanon gikan sa PRO 6.
Sila ang gin-akumodar naman sang mga Filipino communities nga yara sa Netherlands kag ang mga atleta ang ginhatagan man sang card nga ila ginagamit para sa libre nga transportasyon sa pungsod.
Dugang pa sini nga ang mga pahampang ang natunga sa mga categories kun sa diin siya ang nagpartisipar para sa individual event sang Karatedo.
Suno kay Perania, 11 sila ka mga kapulisan ang nagpartisipar sa Karate tournaments.
Si Perania ang naka-assign sa Regional Learning and Doctrine Development Division sang PRO 6 kun sa diin sila ang nagahanas sang mga kapulisan para sa Schoolings, Trainings kag Special Courses.
Indi naman bag-o para kay Perania ang paghampang sa international stage bangod nakabahin naman ini sadto sa Southeast Asian Games kag iban pa ka mga International Games.
Aminado naman ini nga nangin pinakamabudlay sini nga kontra sa finals ang host country nga Netherlands bangod pabor sa ila nga atleta ang mga judges.
Bangod dehado ini sa puntos, gintinguhaan nalang ni Perania nga malutos ang kasumpong pinaagi sa techincalities kaangay sang paggwa sa linya kag paghakos nga makabig violations.
Nahibaluan nga ang World Police and Fire Games ang ginapatigayon kada duha ka tuig kun sa diin kabahin man si Perania sa mga delegates sang 2019 Games kag sang 2021 kuntani ang hampang apang gin-isol sa 2022 bangod sa pandemic.
Magluwas sa Karatedo, ang World Police and Fire Games ang ginalakipan man sang Taekwondo, Basketball, Table Tennis, Long Tennis, Arm Wrestling kag iban pa nga pahampang.
