Wala sang narecord nga insidente sa Western Visayas nga maangot sa pag-umpisa sang local campaign period para sa May 9, 2022 elections.
Sa interview sang Bombo Radyo Bacolod kay Police Lt. Col. Arnel Solis, spokesperson sang Police Regional Office 6, malinong kag matawhay ang una nga adlaw sang campaign period sa mga local nga kandidato sa bug-os nga Western Visayas.
Alas-12:00 sang kaagahon kahapon nagpatigayon ang mga ini sang simultaneous nga Comelec check points region wide.
Suno kay Solis, wala sang may nakahibalo sang ginapatigayon nga COMELEC check points agud nga madakpan ang mga persona nga may ginatago ilabi na ang mga nagadala sang armas-luthang ukon bladed weapons.
Nagpanawagan man ini sa mga pumuluyo kag mga kandidato nga padayunon lamang ang kooperasyon sang mga ini sa mga otoridad agud mapabilin ang kalinong kag katawhay sa kampanya sang local candidates.
Nagapadayon man ang ila nga koordinasyon sa iban nga government agencies kag ang pagpatigayon nga check points agud nga mapabilin ang malinong kag matawhay nga pagpatigayon sang May 9, 2022 elections.
