Nagpatigayon ang regional director sang Police Regional Office – Negros Island Region sang simulation exercise sa 5 minute response sang Philippine National Police kadungan sang pagbisita sini sa Bacolod Police Station 7.
Natigayon nga makaresponde ang mga kapulisan sa sulod sang 2 minutes kag 21 seconds.
Ini ang ginkalipay man sang City Director sang Bacolod City Police Office nga masarangan sang mga kapulisan sa ciudad sang Bacolod nga isa ka highly-urbanized City ang pagresponde sa sulod sang lima ka minutos.
Sa interview sang Bombo Radyo Bacolod kay Police Col. Joeresty Coronica, pila ka simulation exercise ang ginpatigayon sa ciudad sang Bacolod kag isa diri ang ginpatigayon sa pagpanguna mismo ni PRO-NIR director Police Brigadier General Arnold Thomas Ibay sa Bangga Metal.
Suno kay Coronica, iya na-monitor ang ginpatigayon nga simulation exercise kag diri nakita nga masarangan sang mga kapulisan ang 5-minute response.
Samtang ginpakamaayo man sini ang pagbisita sang regional director sa mga police stations agud nga makita ang matuod nga sitwasyon sang mga kapulisan.
Dugang pa sini paagi sa surprise visit sang regional director ma-aware ang mga kapulisan sa ground nga mahimo gid sila nga bisitahon indi lang sang opisyales sa Bacolod City Police Office kundi ang mga official nagikan sa regional office.
Nagpanawagan man ini sa mga pumuluyo nga instindihon ang mga kapulisan nga nagapatigayon sang simulation exercise bangud ini ang ginapatigayon tagsa ka shift sang mga kapulisan.
Ginkalipay naman sang mga police personnel sang Bacolod Police Station 7 ang pagbisita ni PRO-NIR Director PBGen. Arnold Thomas Ibay.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, nalipay ang mga ini kag nakaboost man sang ila nga mga moral.
Suno kay Santillan, ginkamusta sila ni Ibay kag naghatag man sang guidance sa mga kapulisan.
Suno sa station commander ang pagbisita sang PRO-NIR Director ang surprise visit.
Aminado si Santillan nga wala sila nakapreparar kag ginpakamaayo niya man ini agud nga makita sang regional director ang actual nga nagakatabo sa police station.
Si Ibay ang nagbisita man sa pila ka police stations sa idalom sang Bacolod City Police Office.
