Nagpasalig ang Police Regional Office-Negros Island Region (PRO-NIR) nga hatagan gilayon sang bulig kag suporta ang pamilya ni Police Master Sergeant Devy Carampatana, ang pulis nga napatay sa drug buybust operation sa Sitio Talaptap, Brgy Talaptap, La Castellana, Negros Occidental kagab-i.
Sa interview sang Bombo Radyo Bacolod kay Police Lt Col Joem Malong, spokesperson sang PRO NIR, ginakondenar sang PRO NIR ang natabo kag nagpahayag nga indi malipatan sang publiko ang serbisyo ni Carampatana.
Suno diri, may ihatag nga assistance sa pamilya sa haya sang pulis.
Suno kay Malong, ginalauman nga makarecover na sanday Deputy Chief of Police, Police Captain Michael Muñez kag Police Corporal Gerson Guache nga napilasan sa insidente.
Pahayag sini, narekober sa subject person nga si Edward Acupan, ang P47,600 nga balor sang illegal nga droga, buy bust money, drug paraphernalia kag bladed weapon.
