Nagpahanumdom ang Police Regional Office Negros Island Region (PRO NIR) sa publiko nga likawan ang pagpost nga nakasuksok sang police uniform gamit ang Artificial Intellgence (AI).
Sa interview sang Bombo Radyo kay Police Lt Col Joem Malong, Spokesperson sang PRO NIR, ginpahayag sini ginadumilian ang paggamit sang police uniform agud mag-impersonate sang police personnel.
Lakip man diri ang pagsuksok sang Armed Forces of the Philippines (AFP) uniform, BJMP, BFP kag iban pa nga uniformed personnel.
Paandam sini sa publiko nga ang indi otorisado nga paggamit sang police uniforms ukon insignia lakip na ang AI-generated content nga ginapost online ang possible nga manabat sa idalom sang Article 179 of the Revised Penal Code, ukon Illegal Use of Uniforms or Insignia may kaangtanan sa Section 6 sang Republic Act No. 10175, nga kilala bilang Cybercrime Prevention Act.
Ginpahanumdom man ni Malong ang publiko nga indi tanan nga makita sa social media ang matuod kag kinahanglan gid nga iverify ini.
Paathag man sini nga ang pagsuksok sang police uniform ang indi hampang-hampang lang bangud ang madakpan nga nagahimo sini ang possible nga mapasakaan sang kaso.
