Nagpatigayon sang send-off ceremony ang Police Regional Office – Negros Island Region para sa oplan TAWID program ukon ang Tendering Assistance With Integrity and Dedication program para sa mga pamilya nga apektado sang 6.9 magnitude nga linog nga nagluntad sa Bogo City, Cebu.
Sa interview sang Bombo Radyo kay Police Lieutenant Colonel Joem Malong, spokesperson sang PRO-NIR, nakakolekta ang PRO-NIR sang 3,501 kilograms sang bugas nga may katumbas nga 61 ka sako sang 50 kilos nga bugas, 19 ka sako sang 25 ka kilo kag 15 ka magagmay nga sako sang 5 ka kilo kag may yara pa sang 48 ka mga assorted goods kag essential items halin sa Regional Headquarters, Regional Mobile Force Battalion, Marine Amphibious Ready Unit (MARU), Negros Occidental Police Provincial Office, Negros Oriental Police Provincial Office, Siquijor Police Provincial Office kag Bacolod City Police Office.
Ang mga relief goods ipanagtag sa mga residente sang Bogo City nga naapektohan sang mabaskog nga linog.
