Naghatag sang pahanumdom ang pinuno sang Regional Women and Children Protection Desk sang Police Regional Office – Negros Island Region (PRO-NIR) sa mga ginikanan kasubong man sa bug-os nga komunidad nga bantayan ang aktibidad sang ila mga babayi mga kabataan online.
Sa interview sang Bombo Radyo Bacolod kay Police Captain Wilma Silva, dapat tsekyaron sang mga ginikanan ang aktibidad sang ila mga kabataan online bangud ang trend sa karun ang makita na sa internet.
Suno kay Silva, indi man dapat magkahadlok ang mga bata sa pagpanugid sa ginikanan sang nagakatabo,ilabi na kun sila ang biktima na sang pagpang-abuso.
Suno diri kun wala sila sang masugiran nga ginikanan may yara sang Barangay VAWC (Violence Against Women and Children) Desk, DSWD kag Women and Children’s Protection Desk sang PNP nga handa magpamati kag magbulig sa ila.
Dugang pa sini nga dako ang mabulig sang mga impormasyon nga ila nga mahatag sa mga otoridad sa pagsolbar sang mga kaso sang pagpang-abuso.
Nagpanawagan man si Silva sa mga ginikanan nga nakahibalo nga ang ila mga kabataan ang biktima sang pagpang-abuso nga indi pag-itolerat kag dapat i-report sa mga otoridad agud nga matapna.
