Nagpagwa sang statement ang Police Regional Office 7 angot sa pahayag sang mga ginatudlo nga mga suspetsado sa pagpatay kay Negros Oriental Governor Roel Degamo nga ang ila mastermind amo si 3rd District Negros Oriental Governor Arnulfo Teves.
Suno sa ginpagwa nga pahayag, una na nila nakuha ang nasambit nga impormasyon sang nadakpan ang apat ka mga suspetsado anum ka oras ang nakaligad matapos nagluntad ang insidente.
Samtang may yara sila sang significant developments sang mas temprano sang ginapatigayon nga massive hot pursuit operations, wala anay nila ini ginpakigbahin agud nga indi makompromiso ang ginapatigayon nga imbestigasyon.
Sang nakumpleto na ang nagakaigo nga dokyumento, ginturn-over nila gilayon ang mga suspek kag mga ebidensya bilang kabahin sang proseso, kaupod ang extra-judicial confessions nga ginkuha santo sa layi.
Sang ginforward na ang kaso para sa inquest, may yara na sila sang kompleto nga picture sang natabo antes, pagkatabo kag matapos ang insidente, kalakip na ang mga identities sang mga suspetsado, kalakip na ang ginatudlo nga mastermind.
Ini ang nangin resulta sang tanan nga relentless operations nga ginpatigayon gilayon sang mga personnel sa ground matapos nagluntad ang pagpang-atake.
Sa karun, ang prosecution sang kaso ang yara sa idalom sang control sang Department of Justice matapos nga duha sa apat ka mga suspetsado ang nagpabutyag nga willing ang mga ini magtestigo sa korte bilang state witness.
Samtang, liwat naman nga nagapanugyan ang pamunuan sang Police Regional Office 7 sa mga pumuluyo sa Negros Island nga kun may yara sila sang impormasyon nga may kaangtanan sa mga suspetsado ukon makaduluda nga persona sa ila nga lugar, magreport sa mga otoridad ukon mahimo man sila nga magpakig-angot sa mga police stations nga malapit sa ila nga lugar.
