Priso ang isa ka lalaki nga under probation pa sa drug case matapos nga liwat nadakpan sa ginpatigayon nga drug buybust operation sang Talisay City Police Station alas-8:30 kagab-i.
Suno kay P/Lt Marion Vicente Buenaflor, deputy chief sa Talisay City Police Station, ang suspetsado ang ginkilala kay John Patrick Dela Cruz, 24 anyos kag residente sa Purok Santan, Barangay Zone 12, Talisay City, Negros Occidental.
Nakuha sa iya paghinakop ang 12 tanan ka small heat sealed transparent plastic sachet sang suspected shabu kalakip na ang buybust item.
Ang suspected shabu nga narecover ang ginabanta nagabug-at sang tatlo ka gramos kag may standard drug price nga P20,000.
Nakuha man diri ang duha ka coin purse, disposable lighter kag iban pa nga drug paraphernalia.
Si Dela Cruz ang ginakabig nga high value individual bangod ini ang ikaduha na ka beses nga siya ang nadakpan sa nasambit nga iligal nga buluhaton.
Suno kay Buenaflor, under probation pa ini sa nauna nga drug case apang waka na nagareport sa estasyon, tubtob sa ini ang namonitor nga nagasegi sa gihapon sa pagbaligya sang droga.
Ang suspetsado ang nakahunong na sa Talisay City Police Station kag magapangatubang sa nagakaigo nga kaso.
