Tubtob sa karun, wala sang may nabaton nga reply ang gobernador sang probinsya sang Negros Occidental sa sulat sini para sa provincial government sang Cebu nga nagahingyo nga ikonsiderar ang ginpagwa sini nga executive order nga nagaban sang pag-agi sang baboy ukon pork products sa probinsya sang Cebu gikan sa Negros.
Sa interview sang Bombo Radyo kay Governor Eugenio Jose Lacson, bangod nga wala pa sang reply gikan sa Cebu, nangita na lamang sang bag-o nga ruta ang mga hog raisers apang ini ang nagdugang sa ila transportation cost nga manubo naman ang ila benepisyo.
Sa karun, ang mga negosyante sang baboy ang nagabaligya sa Manila apang mas manubo ang presyo.
Suno sa gobernador, ang importante nagapadayon ang ila pagbaligya.
Liwat man sini nga gin-athag nga una nga nagpagwa sang EO si Governor Gwendolyn Garcia sang Cebu matapos ang pagpati nga ang pagpositibo sang Carcar City sa African Swine Fever ang bangud sa mga poultry products nga naghalin sa Negros, gani nagpagwa man sang joint executive order sanday Negros Occidental Governor Eugenio Jose Lacson kag Bacolod City Mayor Alfredo Abelardo Benitez angot sa total ban sa pagpasulod sang mga pork products kag iban pa nga pork related food items nga nagikan sa may positibo nga kaso sang African Swine Fever kalakip na ang nagikan sa Cebu.
Sa karun, padayon ang pagbantay sang probinsya nga indi makasulod ang ASF ilabi na nga napatung-an ini sang duha ka probinsya nga ASF positive.
