Ginpasaka na sa red alert status ang probinsya ang Negros Occidental bangud sa Bagyo Ursula.
Sa interview sang Bombo Radyo Bacolod kay Dr. Zephard Gerhart Caelian, pinuno sang provincial disaster management program division, ila ginrekomendar kay acting governor Jeffrey Ferrer nga ipasaka ang alert level nagikan sa blue pakadto sa red.
Alas-6:00 kagab-i nangin epektibo ang direktiba ni Ferrer nga ipaidalom sa red alert status ang probinsya.
Nahibaluan nga sa idalom sang red alert status, tanan nga mga personnel sang disaster risk reduction and management council ang aktibo 24/7.
Suno pa kay Caelian, nagapabilin sa gihapon sa white alert status ang mga district hospitals kag provincial health office.
Pagalauman naman ang occasionally to frequent heavy rains subong nga adlaw.
Samtang, ginkumpirmar naman ni Bacolod City Disaster Risk Reduction and Management Office cluster head Joemarie Vargas nga may napulo ka mga stranded nga pasahero sa BREDCO port nga temporaryo karon nga nagatinir sa ETCS 4.
Suno diri, naghatag na ang ciudad sang pagkaon kag iban pa nga mga kinahanglanon sa mga pasahero.
Magapabilin ang mga ini sa eskwelahan tubtob magbalik na ang byahe sang barko.
