Naka- blue alert status na ang probinsya sang Negros Occidental matapos nga ginpaidalum sa signal no. 1 bangod sa bagyo Kristine.
Sa interview sang Bombo Radyo kay Negros Occidental Governor Eugenio Jose ‘Bong’ Lacson, ginrekomenda sang Provincial Disaster Risk Reduction and Management Office ang pagdeklarar sang blue alert status sa probinsya.
Suno diri, indi man derekta nga maigoan ang probinsya sang bagyo apang maeksperyensyahan sa gihapon ang pag-ulan.
Preparado na ang DRRMO kag Department of Social-Services & Development (DSSD) pananglitan nga may yara sang dapat nga respondehan.
Dugang pa sang gobernador, bulubantayan ang pagsaka sang lebel sang tubig kag hugot sini nga panugyan nga kun may yara sang abiso sa pagpa-evacuate, dapat nga magsunod na lamang.
Pahayag ni Lacson, importante ang kabuhi kag indi ini dapat pag-usikan.
