Dugang nga doses sang nagkalain-lain nga brand sang bakuna batok sa COVID-19 ang nag-abot sa Negros Occidental kahapon.
Sa interview sang Bombo Radyo kay Provincial Disaster Management Program Division (PDMPD) Head Dr. Zephard Gerhart Caelian, ginkumpirmar sini nga kahapon nga nag-abot sa Bacolod-Silay Airport ang 6,000 vials sang Pfizer vaccine; 14,000 vials sang Johnson and Johnson COVID vaccine nga nagikan sa Department of Health; kag 290 vials sang AstraZeneca vaccine nga ginbakal sang probinsya.
Suno sa iya, sa karun wala pa nahibaluan kun pila ang alokasyon sang nasambit nga bakuna sa kada local government units.
Gin-athag man sini nga magapadayon ang inoculation sa Negros Residences kag Teresita Lopez Jalandoni Provincial Hospital apisar nga holiday subong bangud sa pagselebrar sang Eid al-Adha apang may pila naman ka mga LGU nga gin-untat anay ang pagbakuna.
Suno kay Caelian, kinahanglanon gid sang probinsya sa karun ang bakuna agud mapadasig ang vaccination kag bilang pambato man sa mga COVID variants.
