Ginkumpirmar sang pinuno sang provincial disaster management program division (PDMPD) nga nag-issue si Negros Occidental Governor Eugenio Jose “Bong” Lacson sang blue alert warning sa mga local disaster risk reduction and management offices sa probinsya bangud kay Bagyong Rolly.
Sa interview sang Bombo Radyo Bacolod kay PDMPD head Dr. Zeaphard Gerhart Caelian, ginpahayag sini nga ginmando sang gobernador nga pabaskugon pa gid ang preparasyon sa mga responders pati na ang mga equipment.
Ginapahanda man ang mga ini sa ano man nga ‘eventuality’ nga mahimo matuga ni Bagyong Rolly nga una na ginapahayag nga posible mangin isa ka Super Typhoon.
Suno kay Caelian, bisan indi man direkta nga maga-igo sa Negros Occidental ang bagyo, apang ginalantaw nga maka-apekto gihapon ini sa probinsya.
Sa karon nagadangat sa 6mm ang rain gauge sa Negros Occidental bangud sa pag-ulan ulan.
Nagpanugyan naman si Caelian nga doble dapat ang paghalong bangud ginakahangaw-an ang landslides kag flashflood ilabi na kun gab-i.
