Ginkompirmar sang medical center chief sang Corazon Locsin Montelibano Memorial Regional Hospital (CLMMRH) nga natalana nga patigayunon subong nga adlaw ang proficiency test sa molecular laboratory nga ginpatukod sa nasambit nga ospital.
Sa interview sang Bombo Radyo kay Dr. Julius Drilon, nagalaom ini nga maka-operate na ang molecular lab sa Hulyo 10 apang antes ini, kinahanglan anay sang license to operate nagikan sa Research Institute for Tropical Medicine (RITM).
Suno kay Drilon, agud makakuha sang license to operate, kinahanglan nga mapasar sang molecular lab ang proficiency test.
Suno sa iya, hatagan sila sang lima ka samples sang RITM nga i-test sa laboratory kag ipasa sa mga ini ang resulta.
Suno sa medical center chief, kun magmatch ang resulta sang lima ka mga test, hatagan na sila sang lisensya nga maka-operate.
Kun indi naman ini magmatch, madamo pa sila sang requirements nga kinahanglan ipasa.
Apang nagapati si Drilon nga makapasar sa RITM ang laboratory bangud man sa preparasyon nga ila na madugay nga ginahimo.
Ginakabig man sini nga significant nga adlaw ang Hulyo 7 bangud kahapon nakumpleto ang laboratoryo.
Gindugang man sini nga ginlimpyuhan na ini, ginsterilize kag nagpatigayon sang final check sa mga kwarto bilang preparasyon sa proficiency test subong nga adlaw.
Ginpahayag man ni Drilon nga ang molecular lab ang isa ka pamatuod nga kun mag-ugyon kag magkooperar lang ang mga lokal nga opisyal kag kun ipaiway lang ang pulitika, wala gid sang butang nga imposible nga malab-ot.
Samtang, ginakabig naman nga “state of the art” ni Vice Mayor El Cid Familiaran ang nasambit nga molecular lab matapos ang ginpatigayon nga brief tour kaupod ang mga opisyales sang ciudad kahapon.
Suno kay Familiaran, ini ang ikatatlo nga bio-laboratory level 3 sa pungsod nga madasig makapagwa sang resulta sang RT-PCR test kag sarang man makapatigayon sang DNA test, SARS kag HIV.
Suno sa iya, sarang ini nga makacater sang 100 ka mga specimens kada adlaw kag matapos ang 72 ka oras, sarang na nga makuha ang hard copy sang resulta.
Nagapati man ang bise-alkalde nga ini ang solusyon agud nga mangin madasig ang pagbaton sang mga LSIs kag OFW bangud kun gilayon nga mabal-an ang resulta sang swab test, mas madasig nga makagwa sa mga quarantine facilities ang mga ini.
Ginpahayag man sini nga indi lang mga taga-Bacolod ang makabenepisyo sa molecular lab kundi ang bilog nga Negros Occidental.
