Mangayo si Bacolod City Councilor Celia Flor sang program of works sang rehabilitasyon sang tatlo ka dalagko nga merkado publiko sa ciudad.
Madumduman nga naghatag ang Department of Finance sang P150 million nga pondo para sa rehabilitasyon sang mga merkado antes natapos ang termino ni former Mayor Evelio ‘Bing’ Leonardia.
Suno sa chairperson sang committee on markets sa Sangguniang Panlungsod, may ginakaayo sa Libertad Public Market apang nagatulo man gihapon kun nagaulan.
Wala pa man sang dako nga agi sa Central Market samtang wala pa sang nakaayo sa Burgos Market.
Kaina, nagsapol si Mayor Alfredo Benitez sa City Engineer’s Office angot sa rehabilitasyon sang merkado kag iya man ginplastar ang outlook sini para sa proyekto.
May initial naman nga istoryahanay sa contractor sang Bacolod Coliseum kag nagpasugot naman ini nga idownsize ang proyekto agud nga magamit ang nabilin nga pondo sa rehabilitasyon sang mga merkado.
Suno kay Flor, ang Burgos ang unahon bangud mas gamay ini kag mas gamay nga pondo ang kinahanglan.
Dapat man nga hitsuhon ang sectioning sa mga merkado bangud natalupangdan nga may restaurant kag ukay-ukay sa sulod nga wala man nakabutang sa ordinansa.
Pananglitan hitsuhon ang sectioning suno kay Flor, ila man nga panilagan ang economic activity kun ini ang viable.
