Magluwas sa pagpatay sang suga, may patigayunon man nga events karun sa gab-i sa Negros Occidental Provincial Capitol Lagoon para sa Earth Hour 2024.
Sa interview sang Bombo Radyo Bacolod kay Paul Daniel Serrano, coordinator sa Earth Hour 2024 sang Negrosanon Initiative for Climate and the Environment, ang aktibidad ang may tema nga “uniting for our one shared home”.
Ang programa ang maga-umpisa alas-7:30 sa gab-i kun sa diin may-ara sang mga gin-imbetar nga banda kasubong man mga speaker gikan sa nagkalainlain nga sektor nga naga-advocate para sa climate justice.
Apang ang pagpatay sang suga ang opisyal nga patigayunon alas-8:30 tubtob alas-9:30 sang gab-i.
Pinaagi sa programa, nagalaom si Serrano nga mahugpong ang mga youth advocates kag iban pa nga institusyon sa pagpahangop sa importansya sang pagpahagan-hagan sang climate crisis.
Aminado ini nga indi dako ang mahimo nga bulig sang isa ka oras nga pagpatay sang suga bangod sa tuman ka lala na nga climate crisis, apang ini ang mangin simbolismo sang paghugpong nga magapakita nga ang ulupod nga paghulag ang makahatag sang positibo nga epekto sa dunang manggad.
Pahanumdom ni Serrano nga makahaladlokan na sa karun ang climate change kun sa diin tuman ka lala na ang El Niño kag La Niña kag mas nagabaskog nagid ang mga bagyo kag iban pa nga natural disasters.
Samtang ang posisyon sang Pilipinas sa kalibutan ang isa naman sa may pinakadako nga risgo sa nasambitan nga kalamidad.
Suno kay Serrano, ang mga pamatan-on ang isa sa mga nagapanguna nga apektado sa nagakatabo nga pagbag-o sa kalibutan, gani mas maayo pinaagi sa aktibidad, matudlo sa mga ini ang importansya sa paghatag sang bili sa dunang manggad.
Gani panawagan sini sa mga pamatan-on kag iban pa nga sektor sa sosyodad nga buylugan ang libre para sa tanan nga aktibidad, mag-enjoy, magpamati kag maghatag sang gamay nga oras para sa mother earth.
