Nagpasalig ang Bacolod Transportation and Traffic Management Department nga sila ang magapagwa man gilayon sang advisories kun maplastar na ang dalagan sang patigayunon nga indignation rally sa Domingo, Setyembre 21 batok sa malala nga kurapsyon sa gobyerno.
Sa interview sang Bombo Radyo Bacolod kay BTTMD officer in charge Atty Reuben Sabig, sila ang nagakoordinar na sa Bacolod City Police Office (BCPO) nga amo ang manguna sa pagseguro sang peace and order sa nasambitan nga aktibidad.
Nahibaluan nga may patigayunon nga pagmartsa gikan sa Negros Occidental Provincial Capitol Lagoon padulong sa Bacolod City Public Plaza.
Sa karun wala pa nila mahibaluan kun ano oras maga-umpisa ang pagmartsa, sa diin magalabay, kag kun ang pagplastar sang patigayunon nga indignation rally.
Apang pasalig ni Sabig nga sila ang magapagwa man sang advisories kag rerouting plan kun kinahanglan, sa tion nga maforward na sa ila ang plano sa aktibidad.
Nagpasalig man ini nga may mga postings na sang traffic enforcers sa mga dalanon kag may-ara man sang mga strikers nga ipangdeploy.
Sa public plaza, may-ara na sang orihinal nga nakaposting nga 10 ka traffic enforcers kag ini ang mahimo pa madugang sang 10 ukon masobra pa nga strikers.
Ginalantaw ni Sabig nga mahimo indi gid man makatuga sang malala nga trapiko ang indignation rally bangod Domingo, wala sang klase kag madamo man sang wala sang opisina.
