Magaupod ang kapulisan sa Bacolod kag Negros Occidental sa programa nga patigayunon kadungan sang selebrasyon sang ika-124 nga anibersaryo sang Philippine Independence, bwas, Hunyo 12.
Suno kay Police Lt. Abegael Donasco, spokesperson sang Negros Occidental Police Provincial Office, magatambong ang mga personnel sa event sa Kapitolyo nga pamunuan sang mga opisyales sang probinsya ilabi na si Governor Eugenio Jose ‘Bong’ Lacson.
Ang tagsa naman ka mga police station ang may yara man sang kaugalingon nga event, depende sa local government unit kun sa diin sila nahamtang.
Suno sa NOCPPO spokesperson, magapabilin ang hugot nga pagbantay sang mga pulis sa seguridad sa probinsya.
Aminado si Donasco nga lain ang selebrasyon subong nga tuig kun ipaanggid sang tuig 2020 kag 2021 bangud mas halog na ang restrictions sa COVID kun sa diin allowed na ang pagtililipon outdoors.
Pagkatapos sang Independence Day, magapatigayon ang NOCPPO sang shootfest nga pakigbahinan sang mga pulis kag mga sibilyan apang wala pa sang fixed nga petsa ang kahiwatan.
Suno kay BCPO director Police Col. Thomas Joseph Martir, may flag raising ceremony ang BCPO bwas, dungan sa flag raising sa national headquarters sa Campo Crame, via Zoom.
Kadungan sang programa, may releasing of the doves kag mabatian man nila via Zoom ang mensahe ni PNP chief Police General Vicente Danao Jr.
