Opisyal na nga ginlunsyar sang City Government sang Victorias kahapon, Oktubre 11, ang proyekto nga may tinutuyo nga tapnaon ang problema sa kagutom kag malnutrisyon paagi sa pagpasanyog sang agrikultura.
Ini ang project victory ang ginpatuman sang Victorias City Government kag AGREA Agricultural Systems International Inc., sa pagpanguna sang ila founding president nga si Cherrie Atilano kag amo man ang Food Security and Nutrition consultant sang Victorias.
Sa statement ni Victorias City Mayor Javier Miguel Benitez nga handum sang Project Victory nga mangin madinalag-on ang tagsa ka Victoriasanon sa pagpanguma, pagbaligya sang ila kaugalingon nga produkto kag pag-amlig sang dunang-manggad.
Suno pa diri, tinutuyo sang proyekto nga mabuligan ang lokal nga mga mangunguma para sa mas maayo nga produksyon, nga ginalantaw dako nga bulig nga makaangkon sang bastante nga pagkaon, kag maayo nga nutrisyon kag mangin mayo ang ikaayong-lawas sang mga pumuluyo sang nasambit nga ciudad.
