Ginlunsyar na kahapon ang ‘Project Dasig’ sang Negros Occidental Police Provincial Office (NOCPPO) sa Talisay Component City Police Station.
Ang Project Dasig ang isa ka app kun sa diin iga-rehistro ang numero sang establisyimento agud nga madasig ang pagreport kag paghatag sang impormasyon sa kapulisan.
Sa interview sang Bombo Radyo Bacolod kay Police Captain Judesses Catalogo, public information officer sang NOCPPO, tinutuyo sang ‘Project Dasig’ nga mapasangkad kag mapaabtik ang pagresponde sang kapulisan sa mga krimen.
Inisyal nga nadisenyo ang proyekto partikular na sa mga financial insitution kag business establishment.
Suno kay Catalogo, kun mangin maayo ang feedback sang ‘Project Dasig’, target naman nila sa dason amo nga malakip man diri ang iban nga klase sang institution kag pag-endorse sini sa mga local chief executives sa probinsya.
Sa karun, padayon pa ang pagdevelop kag innovation sa proyekto para madeterminar kun ano nga klase sang insidente ang nagluntad, kaangay na lamang sang robbery, shooting ukon burning incident agud ma-tap man ang iban nga ahensya nga kinahanglan magresponde.
Suno kay Catalogo, ginpili ang Talisay Component City Police Station para ilunsyar ang Project Dasig apang naimplementar naman ini sa 12 pa ka mga ciudad sa probinsya.
