Nagapati ang project development officer 2 sang Department of Education Division of Negros Occidental nga indi madali-dali kakas ang Senior High School bangud ini ang nalakip sa isa ka layi nga dapat ipatuman.
Sa interview sang Bombo Radyo Bacolod kay Ian Arnold Arnaez, ginuntat lamang sang mga state universities kag colleges ang pagpatigayon sang senior high school program sa ila mga eskwelahan bangud nga natapos na ang nakasugtan nga buligan ang department of education sa pagpatuman sini apang wala ini ginkakas sa curriculum.
Suno kay Arnaez, padayon ang ila pagpatigayon sang senior high curriculum sa Department of Education bangud indi ini madasig makakas bangud nakasaad ini sa layi sa idalom sang RA 10533 Enhanced Basic Education Act of 2013.
Suno diri, ini ang makakas lamang kun amyendahan sang kongreso ang nasambit nga layi.
Indi man apektado ang Negros Occidental sa indi pagpahanugot sang mga state universities nga magpatigayon sang senior high school bangud pila lamang ang state universities sa probinsya kag indi man masiguro kun nagaoffer ini sang senior high.
Samtang, ginpahayag man sini nga wala sang programa ang gobyerno nga perpekto gani ginpahayag sini nga may yara lamang sang dapat iimprove sa senior high curriculum kag isa na diri ang relevance agud makakita gilayon sang trabaho sa tion nga makagraduate ang mga estudyante.
Panugyan sini sa mga estudyante nga magtuon sang maayo kag indi pagpaminsaron nga nagdugang sa kabulayan ang senior high bangud ini man ang para man sa ila kaayuhan.
