Nagdangat na sa 60 ang nangin recepients nga estudyante sa project LAPIS sang Toboso Municipal Police Station sa mga far-flung barangays ukon sa nabukid na nga bahin sang banwa.
Suno kay P/Maj. Jun Ray Batadlan, hepe sang Toboso Municipal Police Station, ang project LAPIS ukon Law enforcers Assistance to Poverty and Insurgency affected Student, ang ginhuman para sa anti-insurgency drive sang Philippine National Police (PNP).
Bilang kabahin sa community relations, focus sang Police Station nga mabuligan ang mga estudyante gikan sa mga far-flung Barangays’ sa Toboso nga mabudlay sakaon kag tumalagsahon lamang malab-utan sang bulig gikan sa gobyerno.
Ginsugudan sang mga ini ang project LAPIS duha na ka semana ang nakaligad bangod nakita nila nga ang mga lapis nga masami gamit sang mga kabataan sa pag-eskwela ang tuman na ka gamay kag kun kaisa ginatunga pa agud magamit sang iban.
Paathag ni Batadlan nga nagapati ang PNP nga edukasyon ang makasolbar sa insurhensya, kag pinaagi sa paghatag sang school supplies sa mga kabataan nga luyag magtuon, malayo ang mga ini sa pagsulod sa makawala nga grupo.
Magluwas sa mapunggan ang pagsulod sa insurhensya, sa inisyatibo makabulig pa ang mga kapulisan agud malab-ot sang mga kabataan ang ila nga handom.
Suno sa hepe, dako na nga bulig ang isa ka lapis sa isa ka estudyante kag pinaagi sa ila pagpanghatag magatatak man sa ila nga luyag sang mga kapulisan nga sila ang makatapos para sa ila bwas damlag.
Magluwas sa pagpanghatag sang school supplies sila ang may ginapatigayon man nga mga lecture programs agud mapakita nga ang gobyerno ang nakahanda nga magbulig.
Pahayag ni Batadlan nga pinaagi sa programa, amat-amat man nga madula ang notions kun sa diin nahadlok ang mga kabataan sa tion nga makakita sang kapulisan.
