Luyag sang Federation of Sicogon Farmers and Fisherfolk Associations (FESIFFA) nga matigayon ang revocation sang deal sa Ayala Land Inc. (ALI) bangod sa mga promisa nga wala natuman sa pagpasanyog sang isla.
Sa ipa-BOMBO Ta segment sang Bombo Radyo Bacolod, ginpahayag ni Janjan Bernal, nga sang 2014 may yara sang compromise framework agreement nga ginhimo sa tunga sang FESIFFA kag ALI kun sa diin nagpormisa ang ALI nga idevelop ang isla.
Suno diri, nalakip diri ang komunidad, typhoon resilience nga mga balay kag livelihood sang mga tawo.
Apang sa ginhatag nga livelihood iban wala nahatagan kag mas ginprayoridad pa nga mahatagan sang palangabuhian ang mga pangayaw sang sa ila nga mga residente didto.
Panawagan ni Bernal nga mabuligan sila nga mga residente sang isla para sa ila nga palangabuhian.
Samtang, wala napuslan sang mga residente sang Sicogon Island ang mga balay nga gintukod sang Ayala Land Inc. (ALI).
Sa interview kay Eufemio Alcala Jr sang Federation of Sicogon Farmers and Fisherfolk Associations (FESIFFA), sa promisa nga typhoon resilient housing, ang mga balay nga gintukod napilahan lamang ka tuig apang ang gin-anay na.
Suno pa diri, may yara sang gintukod nga model house apang ang gingasto ginbawas sa budget sang housing.
Suno kay Alcala, luyag lamang sini nga mahatagan sang maayo nga bwas damlag ang mga sunod nga henerasyon kag nagalaom ini nga ang development sang ALI makabulig kun tani apang baliskad ang natabo.
