Nagalaom sang conviction ang pamilya sang legal counsel sang pamilya Mangudadatu kadungan sang promulgation sa Maguindanao massacre case, Huwebes sang aga.
Sa interview sang Bombo Radyo kay Andrea Amanda Jayme, utod ni Atty. Concepcion Jayme – Brizuela, ginpahayag sini nga nagalaom sila sang desisyon nga nagapabor sa mga biktima.
Si Brizuela nga tumandok sang Brgy. Mansilingan, Bacolod City ang isa sa duha ka mga abogado ni Mangudadatu nga nag-upod sa convoy apang ginlambatan sang armado nga mga lalaki, gindala sa Sitio Masalay kag ginpatay.
Suno sa iya, tuparay ang iya nga utod kag si Mrs. Genalyn Mangudadatu nga misis ni subong Maguindanao 2nd District Congressman Esmael Mangudadatu sa van.
Gindugang niya man nga nagatext pa si Brizuela sa isa ka councilor sa ila nga lugar nga gin-abduct sila sang mga Ampatuan kag gindala sa wala nahibaluan nga lugar apang matapos ini, wala na siya nakatext liwat.
Nasapwan ang bangkay sang mga biktima sang Nobyembre 23 kag suno kay Jayme, ang iya nga utod ang pinakauna nga naretrieve sang Scene of the Crime Operatives (SOCO).
Sang makit-an ang bangkay sini, wasak ang iya nga ulo.
Ginlubong ang bangkay ni Brizuela sa Brgy. Del Carmen, President Roxas, North Cotabato.
Ang desisyon sa Maguindanao massacre ang ipapanaog ni Judge Jocelyn Solis-Reyes sang Quezon City Regional Trial Court Branch 221 sa Quezon City Jail Annex sa Camp Bagong Diwa sa Taguig City, alas-9:00 sang aga.
Ginpasalamatan man sang pamilya sang legal counsel sang pamilya Mangudadatu ang mando ni Judge Jocelyn Solis-Reyes nga ibalik sa prisuhan ang isa sa mga primary suspects nga si Zaldy Ampatuan, isa ka adlaw antes ang promulgation sang kaso.
Nahibaluan nga gin-deny ni Reyes sa isa ka three page order ang request sang anay gobernador sang Autonomous Region in Muslim Mindanao nga magpabilin sa Makati Medical Center.
Ginmanduan sini ang warden sang Quezon City Jail Annex nga sugaton si Ampatuan pabalik sa iya nga detention facility sa Camp Bagong Diwa sa Taguig City.
Suno sa judge, sa medical abstract nga ginpasa sa korte, neurologically stable na si Ampatuan kag wala na ini nagareklamo sang pagsakit kag paglingin sang ulo gani sarang na ini nga makagwa sa hospital.
Sa interview sang Bombo Radyo kay Andrea Amanda Jayme, utod ni Atty. Concepcion Jayme – Brizuela, ginpahayag sini nga dapat lang nga ibalik si Ampatuan sa prisuhan agud nga masaksihan niya ang desisyon sang korte.
Suno kay Jayme, nagalaom ini sang harsh nga desisyon halin sa korte bangud indi basta-basta ang gin-ubra sang mga suspetsado.
Suno sa iya, kun maconvict ang mga ini, mangin malinong na ang kalag sang mga biktima sang makasilidni nga hitabo.
Nagalaom man ang pamilya sang Chief of Reporters sang Bombo Radyo Koronadal nga kalakip sa mga biktima sang Maguindanao massacre nga conviction ang mangin desisyon sang korte.
Suno kay Teresita Maravilla, utod ni anay Bombo Bart Maravilla, ginpahayag sini nga madugay na niya ginapangamuyo nga mahatagan sang hustisya ang iya nga manghod.
Suno kay Maravilla, brutal ang gindangatan sang iya nga utod kag tubtub subong, nagasakit gihapon ang iya dughan kun madumduman sini ang natabo.
Suno sa iya, dako gid nga kawalan ang anay journalist bangud mapisan ini kag nagapaninguha gid para sa iya nga pamilya.
Gindugang niya man nga may yara ini sang lima ka mga kabataan nga sa karun nagapanghimakas bangud wala na sila sang padre de pamilya.
Suno kay Maravilla, kun conviction ang mangin resulta sang kaso, mahagan-hagan gid ang ila nga kahangawa apang kun magsuli ang desisyon suno sa iya, indi na sila magpati nga may hustisya pa sa pungsod.
Nagapasalamat man ini bangud ginbalik sa prisuhan ang isa sa mga primary suspects nga si Zaldy Ampatuan kag nagpangabay man siya nga kuntani indi ini paghatagan sang special treatment sa prisuhan.
Samtang, magabantay man ang National Union of Journalists of the Philippines – Bacolod Chapter sa promulgation sang Maguindanao massacre case.
Sa interview sang Bombo Radyo kay NUJP Bacolod chairman Marchel Espina, ginpahayag sini nga bangud indi man makakadto sa korte ang mga katapo sang media sa ciudad, magaset-up nalang sa opisina sang Negros Press Club agud makabantay sang live media coverage.
Nagpangagda man si Espina sa mga katapo sang media nga luyag mag-ugyon sa ila sa pagbantay sang desisyon.
Suno sa iya, nagakalipay sila sa pagpahanugot sang live media coverage sa promulgation bangud may yara sang mga pamilya sang mga biktima nga indi makasarang magkadto sa Manila.
Nagalaom man ang NUJP Bacolod chairman nga ma-convict ang mga suspetsado kag mahatagan sang hustisya ang makasilidni nga hitabo.
Mangin ang isa ka abogado sa Negros Occidental ang indi sigurado kun sanday sin-o kag pila kabilog ang maconvict nagikan sa madamo nga mga akusado may kaangtanan sa Maguindanao massacre.
Sa interview sang Bombo Radyo kay Atty. Jomax Ortiz, gina-ekspektar sini nga conviction ang mangin desisyon sang korte apang bangud wala sang direct witness, indi ini sigurado kun sanday sin-o kag pila ang masilutan.
Suno kay Ortiz, apisar sang alibi sang primary suspect nga si Andal Ampatuan Jr. nga yara siya sa municipal hall sang natabo ang insidente, kun wala ini sang direkta nga ebidensya, dako ang posibilidad nga maconvict ini.
Suno sa iya, nakatext pa si Mrs. Genalyn Mangudadatu kay anay gobernador Esmael Mangudadatu nga si Andal mismo ang nagtampa sa iya.
May ginpatigayon nga forensic investigation tuhoy sa text message kag suno sa abogado, ginakabig ini nga mabakod nga ebidensya.
Gindugang niya man nga possible man nga maconvict si Zaldy Ampatuan.
Aminado ini nga ang nasambit nga insendente ang pinakamakasilidni nga kaso nga iya nahibaluan kun sa diin 58 ka mga tawo ang ginpatay gani nagalaom man ini nga mahatagan sang hustisya ang kamatayon sang mga biktima.
