Ginsuguran na ang pagbakbak ang bahin sang bodega sang asin nga naga-obstruct sa drainage system nga nagresulta sang madugay nga pag-subside sang tubig-baha sa Barangay Banago sang tinalikdan.
Madumduman nga ang pagtabon sang Artemis Salt Corporation sa drainage system ang ginalantaw nga isa sa mga rasun sa madugay nga pagsubside sang baha sa Prk Sta. Clara, Barangay Banago, Bacolod City, gani sila ang gindagdagan sang abatement and removal order sang Sabado.
Sa intreview sang Bombo Radyo Bacolod kay Engr. Loben Ceballos, officer-in-charge sang Bacolod City Engineer’s Office, wala nagpakita ang representative sang bodega sang asin sa compliance conference sang Lunes, dala kuntani ang pamatuod nga sila ang nagsunod sa order kag gindemolish na ang propedad.
Bangod sini, ginpadulungan sang duha ka team sang maintenance division ang propedad dala ang jack hammer, kag yara man ang mga personnel sang City Legal Office.
Apang suno kay Ceballos, nakita nila nga may nasuguran na sa pagbakbak ang mga personnel sang Artemis Salt Corporation, gani sila ang nag-assist na lamang agud mapadasig ang trabaho.
Magluwas sa pagbakbak sang riffraff kag pagpadako sang exit sang tubig, husuyon man nila ang drainage system bangod nagapati ang mga ini nga may mga areas pa nga nasupnan.
Agud masolusyonan naman ang problema sa kompanya tuhoy sa pagsulod sang tubig sa bodega sang asin, sila ang magatukod man sang bag-o nga tabon, nga indi na mabalabagan ang drainage system.
Ginalantaw sini nga matapos ang trabaho sa duha tubtob tatlo ka adlaw.
Padayun man ang operasyon sang bodega sang asin bangod ang ginhatagan lamang sang suspension amo ang warehouse.
