Ginpamatukan sang major business groups sang outsourcing industry sa Pilipinas ang proposal sang Estados Unidos nga dal-on ang customer service jobs sa ila nga pungsod kag indi na mag-outsource diri sa Pilipinas.
Sa position paper nga ginsumiter sa U.S. Federal Communications Commission o FCC, ginpahayag sang IT and Business Process Association of the Philippines (IBPAP), American Chamber of Commerce of the Philippines (AmCham), kag sang US-ASEAN Business Council (USABC) nga wala sang maathag nga ebidensya nga ang mga lehitimo nga offshore call center operations ang rason sang mga problema sa customer service ukon ilegal nga robocalls.
Suno sa grupo, kun limitahan ang paggamit sang offshore call centers, mahimo magsaka ang gastos sang mga kompaniya kag maapektohan ang kalidad sang serbisyo sa mga customer.
Ginpakigbato man nila nga ang mga Philippine-based contact centers ang nagasunod sa pareho nga standards, cybersecurity controls, kag performance requirements nga ginapatuman sa mga U.S.-based providers.
Ang industriya sang call center kag outsourcing ang isa sa pinakamadako nga source sang trabaho kag kita sa Pilipinas.
Pananglitan madayon ang bag-o nga mga patakaran sa U.S., mahimo makaapekto man ini sa pila ka negosyo kag trabaho sa sektor.
