Ginreject sang adviser sa palasyo sang Malacaniang kag sang Health Undersecretary ang proposal sa pagbalik sang mandatory 7-day quarantine sa mga arriving passengers kadungan sa pagkadetect sang mas makalalaton nga omicron subvariants.
Ginpahayag ni Presidential Adviser for Entrepreneurship Joey Concepcion nga indi na kinahanglan ang nasambit nga pagsulundan bangod halos tanan nga pungsod sa kalibutan ang nagpalos na sang kaangay nga protocol.
Paathag sini nga indi na dapat nga magbalik sa 7-day quarantine bangod wala na sang magapadulong sa Pilipinas kag magapugday ang turismo.
Suno kay Conception, nagabangon palang ang mga magagmay nga negosyante nga ang mga negosyo ang nagasalig kasandig sa sektor sang turismo.
Dugang pa sini nga ang labi nga importante amo ang COVID-19 vaccination status sang mga magasulod sa pungsod.
Madumduman nga gin-untat sang gobyerno ang mandatory COVID-19 quarantine sa tanan nga vaccinated travelers sang Enero subong nga tuig.
Ginsuspende naman sang gobyerno ang “green, yellow kag red” COVID-19 risk classifications para sa mga pungsod, teritoryo kag jurisdiction.
Suno diri, indi naman panibag-o nga variant kundi Omricon gihapon kag mas makalalatun lang apang ini ang magahatag lang sang mild symptoms ilabi na sa mga nabakunahan.
Suno naman kay Health Undersecretary Maria Rosario Vergeire, ang pungsod ang dapat makatuon na nga magkabuhi upod sa virus, kadungan sa presensya sang Omicron subvariants.
Paathag sini nga bilang health official, apisar nga may nadetect nga subvariant, ang mga ospital sa pungsod ang indi naman puno sang severe ukon critical cases sang COVID-19.
Imprtante santo diri ang pagpabakuna agud malikawan ang balatian.
Paathag ni Vergeire nga aminado na ang mga ini na magapadayun kag indi madula ang impeksyon sa Pilipinas kasubong man sa iban nga pungsod gani indi na pwede nga dugay-dugay nagasarado kag bukas ang pungsod.
Madumduman nga ang Pilipinas ang liwat nga nagbukas sang borders para sa tanan nga foreign travelers sang tinalikdan nga Abril.
