Lusot na sa second reading sang Sangguniang Panlungsod ang proposed 2021 budget sang syudad sang Bacolod.
Sa interview sang Bombo Radyo kay Bacolod City Councilor Renecito Novero, ginpasar na sa second reading ang 2021 budget sa ila regular session sang Miyerkules.
Ang 2021 budget sang ciudad ang nagadangat sa P2.6 billion kag nagnubo ini sang P400 million kun komparar sang tinalikdan nga tuig bangud sa epekto sang coronavirus pandemic.
Nagpanugyan man ini sa mga kaupod niya sa Sangguniang Panlungsod nga mag-attend sa committee budget hearing agud nga maamyendahan ang dapat amyendahan kag maathagan ang luyag nga hatagan sang paathag.
Nahibaluan nga nagdugay ang deliberasyon sang 2021 budget para sa second reading bangud sa mga pamangkot ni Councilor Wilson Gamboa kag ginhatagan man sang paathag.
Pila man sa ginpamangkot sang konsehal ang dako nga ginpain nga budget sa Office of the City Mayor komparar sa City Health Office kag Disaster Risk Reduction and Management Office.
Samtang, ginpahayag man ni Councilor Wilson Jun Gamboa nga indi sini luyag nga balabagan ang pag-aprubar sa 2021 budget sang syudad kundi luyag lamang sini nga maathagan angot sa 2021 budget.
Ginpangabay niya sang nagligad pa nga semana ang committee chair sang committee on finance nga may concern ini angot sa budget sang Office of the Mayor, CHO kag DRRMO kag kun indi niya masabat ang mga pamangkot, mahimo gid sila magpangayo sang bulig sa department heads agud nga indi na makatuga sang delay sa ila deliberasyon.
Suno pa diri, invitation lamang sa Sangguniang Panlungsod ang pagtambong sa Committee Budget Hearing kag indi ini mandatory.
Obligasyon man sang chairperson sang Committee on Finance ang pagsabat sang palamangkutanon sa tion nga may luyag sila maathagan sa budget apisar nga yara pa sa deliberasyon.
