Ginkumpirmar ni Negros Occidental Governor Eugenio Jose “Bong” Lacson nga nagsaka sang 7% ang budget sang probinsya para sa tuig 2021 kun ikumparar sa budget subong nga tuig.
Sa interview sang Bombo Radyo kay Lacson, ginpahayag sini nga yara sa P4.5 billion ang proposed 2021 provincial budget nga iya ginpasa sa Sangguniang Panlalawigan kag mas mataas kun ikumparar sa P4.2 billion nga budget sa karun sang probinsya.
Suno sa gobernador, ini bangud nagasaka man ang Internal Revenue Allotment (IRA) kada tuig.
Ang IRA sang 2020 ang yara sa P3.7 billion samtang sa 2021, nagdangat ini sa P3.9 billion.
Suno diri, dako nga bahin sang budget sini nga tuig ang nagkadto sa Personnel Services bangud madamo sang ginhire ang probinsya nga mga job order ukon casual employees bangud sa COVID-19 lakip na ang mga nagaubra sa swabbing centers, frontliners kag medical staff.
Nagalaom man si Lacson nga maaprubahan ini antes matapos ang tuig agud may yara na sang budget ang probinsya sa pagbukas sang 2021.
Naapresyar naman sang gobernador ang assurance nagikan kay Vice Governor Jeffrey Ferrer nga maaprubahan ini sa SP antes matapos ang 2020.
