Gin-aprubahan na sa 2nd reading ang masobra P3 Billion nga proposed 2022 Budget sang syudad sang Bacolod sa special session nga ginpatigayon sang Sangguniang Panglunsod kahapon.
Suno kay Councilor Cindy Rojas, Chairperson sa Committee on Finance sang SP, nangin mas madasig ang ila nga deliberasyon sa budget kahapon kun ikumparar sang tinalikdan nga tuig.
Suno sa konsehal, ini bangod temprano pa sang mga ini natun-an ang budget kag nadeliberate naman ini sa nagkalain-lain nga opisina antes paman ang 2nd Reading.
Bangod sini ilisipon nalang ang mga nagpamangkot sa sesyon nga madasig man nga nagakasabat sang resource speakers.
Ang sesyon ang nag-umpisa alas 2:00 sang hapon kag ini ang natapos antes paman ang alas-4:00 sang hapon.
Apang ang proposed budget ang magapaidalum pa sa publication sa sulod sang pila ka adlaw gani indi pa ini malakip sa pagbalik sang regular session sang SP subong nga adlaw.
Ginalantaw ni Rojas nga mahimo mapatigayon na ang 3rd and final reading sa masunod nga semana.
Ginpakigbahin sang konsehal nga ang bulk sang proposed budget ang yara sa General Public Services, Social Services, Social Welfare, Socio Economic Services kag iban pa.
Pasalig ni Rojas nga may natalana nga budget para sa tanan nga sektor nga kinahanglan sang syudad.
Samtang ginpahayag man sini nga madasig ang pag-aprubar subong nga tuig kun sa diin mahimo nga mapasar na subong nga bulan indi kaangay sang gindeliberar ang 2021 budget nga nalab-utan pa ang mga ini sang Desyembre.
Paathag man sini nga bangod wala sila nakapreparar sa pag-igo sang COVID-19 pandemic, gani wala na nila natutukan ang budget sadto kundi nagfocus sa pag-atubang sa balatian.
Nadugayan man ang deliberasyon bangod sa madamo pa sang mga correction antes napasar ang budget.
Nagsaka man ang City Budget sa masunod nga tuig gikan sa P2.6 billion, ginhimo ini nga masobra P3 billion sa 2022.
