P3.6 billion ang ginalantaw nga proposed budget sang Bacolod City government para sa tuig 2024, mas mataas sa P3.250 billion nga pondo sang ciudad subong nga tuig 2023.
Suno kay Mayor Alfredo Benitez, ginaistoryahan sa karon ang budget process bangud igafinalize na ang proposed budget para sa masunod nga tuig.
Suno kay Benitez, ginahatagan sang atensyon ang details sang processes kun paano magdeliberate for budgeting para madamo sang issues nga dapat tamdon.
Suno sa alkalde, magasaka sang P350 million ang pondo para sa masunod nga tuig bangud sa improved revenue collection sang city government kag nagsaka man ang National Tax Allotment sang P100 million.
Tinalikdan nga tuig, nabuhinan sang P300 million ang National Tax Allotment sang ciudad bangud sa manubo nga revenues sang tuig 2020 nga amo ang pagsugod sang COVID pandemic.
Suno kay Benitez, ginasiguro nila nga encompassing ang paghanda sang pondo kag mahatagan sang husto nga budget ang mga programa kag proyekto sa masunod nga tuig.
Suno sa local chief executive, kinahanglan nga mapasa sa Sangguniang Panlungsod ang proposed budget antes matapos ang ikaduha nga semana sang bulan sang Oktubre gani dapat nga matapos ang preparasyon antes ang nasambit nga petsa.
