Ginahulat na lamang sang Sangguniang Panlungsod ang pagsumiter sang City Mayor’s Office sang proposed annual budget para sa 2027.
Sa interview sang Bombo Radyo Bacolod kay Bacolod City Councilor Jude Thadeus Sayson, chairperson sa Committee on Appropriations, sa Oktubre 15 pa ang deadline sang submission, gani ginalantaw nila nga mahimo isumiter sa ila ang proposal antes ang Miyerkules agud matalakay sa session.
Suno diri, sa ulihi nga diskusyon, P5 billion ang ginapropose nga budget sang ciudad, ukon mas mataas sang kapin P250 million sa budget subong nga 2026.
Apang namensyonar man nga nagapangita pa sila sang dugang nga sources sang budget, gani mahimo nga ini ang pasakaan pa.
Sa tion nga mabatun na sang SP ang proposal, ini ang ipaidalom man sa deliberation sang mga konsehal.
Sa karun, masako pa ang mga ini sa Masskara Festival, apang pasalig ni Sayson nga matapos sang piyesta minatay sa Nobyembre, sila ang magapatigayon sang marathon hearing.
Suno diri, ipatawag man sa session ang mga department heads, kag tsekyaron ang ila nga performance sa nakaligad nga tuig.
Pahayag ni Sayson nga kun makita nga halos wala ginatandog ang budget, mahimo hatagan man nila sang gamay ukon indi na hatagan sang budget.
Panindugan sini nga indi kaangay sa negosyo nga mas paborable kun madamo sang mabilin nga savings, ini ang indi aplikable sa gobyerno.
Ang indi paggastos sang budget ang nagakahulugan nga wala naghimo sang mga programa para sa benepisyo sang mga pumuluyo.
Gani para sa iya, ang dako nga bilin sa budget ang katumbas sang poor performance.
Pahanumdom ni Sayson nga gikan sa tax sang publiko ang budget, gani dapat nga ini ang gastuhon man para sa benepisyo sang publiko.
Apang paathag ni Sayson nga ang isaka sa budget ang halos magakadto lamang sa pagsaka sa gastos sa gatong.
Ini bangod ang sadto P50 to P60 million nga magastos sa gatong sa kada tuig, ang sa karun nagsaka na sa masobra P100 million.
Ang budget sang ciudad sang Bacolod ang natunga sa 50 percent gikan sa National Tax Allotment (NTA) kag ang 50 percent ang gikan sa local collections.
