Pasado na sa second reading sa Sangguniang Panlungsod sang Bacolod ang proposed ordinance nga magahatag sang P3 million nga dugang nga assistance para sa Barangay Felisa, nga amo ang host barangay sang Bacolod Sanitary Landfill.
Sa interview sang Bombo Radyo kay Bacolod City Councilor Homer Bais, chairman sang Committee on Environment and Ecology, tinutuyo sang ordinansa nga mabuligan ang mga pumuluyo sang Barangay Felisa, ilabi na ang mga yara malapit sa sanitary landfill nga apektado sang mga problema sa Sanitary landfill.
Suno kay Bais, mahimo magamit ang pondo para sa mga programa sa health, environment kag livelihood, lakip na ang posible nga pagpatindog sang clinic, pagbakal sang mga bulong kag iban pa nga environmental programs para sa mga pumuluyo.
Ginpahayag man sang konsehal nga indi lamang limitado sa P3 million ang assistance nga mahimo mahatag sa barangay.
Bangud suno diri, kun may dugang nga kinahanglanon, mahimo ini madugangan paagi sa supplemental assistance.
Kinahanglan mag-submit ang Barangay Felisa sang mga work program kag health, environmental kag livelihood programs agud ini ang mahatagan sang pondo.
Madumduman nga may pila ka mga pumuluyo sang Barangay Felisa nga nagreklamo nahanungod sa mga problema may kaangtanan sa sanitary landfill, lakip na ang mga kabalaka sa ila ikaayong lawas kag sa kahimtangan sang palibot.
Suno kay Bais, importante nga may dugang nga proteksyon kag suporta ang mga pumuluyo bangud wala na sila sang choice bangud yara na ang landfill sa ila barangay.
Sa pihak sini, positibo naman, suno sa konsehal, ang feedback sang mga pumuluyo kag barangay officials nahanungod sa ginaduso nga ordinansa.
Suno sa Konsehal nga target sang Sangguniang Panlungsod nga maaprubahan ang ordinansa antes matapos ang budget hearing agud maka-alokar sang pondo sang ciudad para sa masunod nga tuig.
