Pasado na sa 1st reading ang proposed budget para sa ciudad sang Bacolod sa 2026.
Sa interview sang Bombo Radyo Bacolod kay Councilor Thaddy Sayson, chairperson sa Committee on Appropriation and Finance sang Sangguniang Panlungsod, nasumiter sa ila sang Office of the Mayor ang Local Expenditure Program antes paman ang deadline nga Oktubre 15.
Ang proposed P4.75 billion Local Budget para sa 2026 ang mas mataas sangsa P4.4 billion budget subong nga 2025.// Ginpatigayon ang reading of title sa SP session kahapon para sa 1st reading, kag ini ang ischedule na nila sa hearing sa nagkalainlain nga mga komitiba tuhoy sa mga budget plans sang lainlain nga departamento kag opisina.
Suno kay Sayson, suguran na nila ang pagtalakay matapos ang Masskara Festival 2025 celebration.
Target sini nga matapos kag mapasar ang budget sa Disyembre 15 antes ang deadline nga Disyembre 31.
Sa mga hearings, welcome man nga makatambong ang mga media partikular na sa mga confidential departments kaangay sang Department of Social Services and Developments, City Health Office, City Engineers’ Office kag City Disaster Risk Reduction and Management Council.
Lakip sa mga prayoridad ni Bacolod City Mayor Greg Gasataya nga ginbutangan sang budget ang expansion sang Bacolod City Comprehensive Health Program (BACCHP), pagpadayun sang assistance sa mga senior citizens kag solo parent kasubong man ang pagpadako sang budget para sa scholarship.
Apisar sa pagsaka sang local budget, paathag ni Sayson nga ini ang bawi lamang bangod nagsaka man ang populasyon sa Bacolod City.
Gani pahayag sang konsehal nga kinahanglan pagid nga ma-imprubar ang tax collection.
