Gin-aprubahan na sang House Committee on Appropriations kahapon sa committee level ang hagna nga P6.793 trillion national budget para sa 2026 matapos ang 37 ka adlaw nga deliberasyon sa level sang komite.
Ginbaton sang komite ang mga ammendments nga ginduso sang sub-committee sang Lunes kun sa diin P255 billion nagikan sa orihinal nga alokasyon sang Department of Public Works and Highways (DPWH) para sa flood control projects ang ginsaylo padulong sa mga programa sang Education, Health kag Social Welfare.
Suno kay House Appropriations panel Chair at Nueva Ecija Rep. Mikaela Angela Suansing, subong nga tuig, ginpatuman ang lapnagon nga reform sa proseso sang deliberasyon sang budget agud iduso ang transparency kag agud malikawan ang kontrobersyal nga insertions nga natabo sang tinalikdan nga tuig.
Sadto, ang mga amyemda ang ginaproseso sang isa ka indi transparent nga “small committee” nga ginalakipan sang pili nga mga kongresista.
