Gindangop ni House Prosecution counsel Atty. Lorna Kapunan sa Senate Impeachment Court nga “gin-Indian” sila sang depensa matapos wala nagsabat sa ila mensahe kag wala nagpakita sang Huwebes ukon Biyernes para kuntani ikumparar ang mga acknowledgement receipts angot sa misuse sang confidential funds ni Vice President Sara Duterte.
Sa iya manifestation sa ika-14 nga impeachment trial, ginpahayag ni Atty Kapunan nga ini ang makonsiderar nga “bad faith.”
Suno diri, ginrasun sang pihak nga partido nga kulang sila sang abogado kag wala sang available nga oras agud masunod ang mandato ni Trial Presiding Officer Francis Escudero.
Gindumdom pa ni Kapunan nga nagpadala sang mensahe ang ila nga bahin sa depensa sang Miyerkules agud pamangkuton kun san-o mahimo magkitaay ang duha ka kampo para sa stipulation sang nasambit nga mga dokumento.
Apang suno kay Kapunan, wala sila sang nabatun nga reply tubtob natapos ang office hours sang Huwebes, sa baylo ginrekomendar sang depensa nga sila ang magkitaay na lamang sa Agosto 14, nga lapaw na sa duha ka petsa nga ginrekomendar sang impeachment court./
Sabat naman ni Defense counsel Atty. Kristine Ferrer nga indi na kinahanglan ikumparar ang mga exhibit bangod korte ang magadesisyon sa pag-aprubar sang authenticity sang mga acknowledgement receipt.
Samtang agud mapamag-an ang tensyon, naglahog naman si Escudero nga si Kapunan ang wala gin-Indian sa baylo siya ang gin-Ghost bangod wala paman sang paghinun-anon.
Sa ulihi, ginmando sang Presiding Officer nga mahatagan sang duha ka kampo ang mga senator-judges sang kopya sang mga namarkahan nga ebidensya sa kasagsagan sang pretrial agud sila na mismo ang magkumparar. Sa pihak nga bahin, ginbasa sa ika-14 nga impeachment trial batok kay Vice President Sara Duterte ang mga aktibidad nga ginpatigayon sa Office of the Vice President Satellite Office sa Bacolod City nga nalakip sa mga gingastuhan sang confidential funds.
Kalakip diri ang paghatag sang rice box para sa mga fire victims sa banwa sang Murcia, payout sa TUPAD beneficiaries sa Bacolod City National High School, kag medical mission.
Ginklaro man ni COA Intelligence and Confidential Funds Audit Office (COA-ICFAO) auditor Xylene del Campo nga indi confidential funds ang gingastos sa mga aktibidad.
Sa baylo, antes sang aktibidad may ginpatigayon nga mga surveillance activities antes ang engagement ni VP Sara, nga ginpasulod sa confidential funds.
Apang ini ang ginlakip sa gin-issuehan sang notice of disallowance bangod sa kakulangan sa pagpakita sang ebidensya sa operasyon.
