Ginabanta nga magadangat pa sa tatlo tubtob apat ka bulan ang rehabilitation sa pagkay-o sang guba na nga bahin sang Burgos Public Cemetery, sa sidewalk, kasubong man ang loading kag unloading zone sa area.
Sa interview sang Bombo Radyo Bacolod kay Bacolod City Administrator Atty Mark Steven Mayo, sadto paman may-ara na sang natalana nga programa ang ciudad para sa rehabilitation sang patyo, apang sang maglaslas ang mabaskog nga hangin bangod sa Bagyo INDAY, ang pader ang halos magcollapse nagid.
Suno diri, sa assessment sang Bacolod City Disaster Risk Reduction and Management Office kag City Engineer’s Office, kinahanglan nagid nga makay-o ang bahin sang sementeryo bangod ini ang delikado na.
Sa karun, porsyon sang Lopez Jaena kag Burgos Street sa atubang sang daw marusdak na nga pader sang sementeryo ang temporaryo nga ginsarado, agud indi mabutang sa peligro ang mga nagalabay.
Ang proyekto ang may budget nga P4.7 million, lakip na diri ang para sa loading and unloading zone, pulungkuan, kag plant box.
Apisar nga luyag nila nga mapadasig ang proseso, apang pahanumdom ni Mayo nga may-ara pa sang proseso nga dapat masunod, ilabi na sa pagtransfer sang skeletal remains.
Apang sa 450 skeletal remains sa area, masobra isa ka gatos nga pamilya lamang ang nagtambong.
Dugang pa nga 15 lamang ka skeletal remains ang sarang masaylo sa bone vault kada adlaw.
