Indi malip-ot nga tinion ang kinahanglan sa bilog nga proseso sang extradition sang religious leader nga si Pastor Apollo Quiboloy nga nagapangatubang sang trafficking charges sa Estados Unidos.
Sa interview sang Bombo Radyo kay Bacolod City Councilor Atty. Renecito Novero, ang proseso sang extradition ang magasugod paagi sa request nagikan sa US Department of Justice padulong sa US State Department nga igapasa sa Department of Foreign Affairs kag magapadulong sa Philippine Department of Justice.
Kun yara na sa DOJ, iga-evaluate sini ang kaso agud matumod kun may yara sang probable cause nga iga-extradite ang subject.
Kun may yara sang probable cause suno kay Novero, magarequest ang DOJ sa Regional Trial Court nga ievaluate ang kaso kun sa diin sarang man nga makapyansa ang subject kun pahanugutan sang korte.
Sa tion nga makadesisyon ang RTC nga sarang ma-extradite ang subject, sarang pa ini nga ma-appeal sa Court of Appeals pasaka sa Korte Suprema.
Indi naman mapaktan kun ano kalawig ang proseso bangud magadepende ini sa kadasigon sang pag-evaluate sang kaso.
