BACOLOD CITY-Nagmartsa ang mga workers sa Hong Kong agud protestahan ang pahayag sang lawmaker nga si Eunice Yung batok sa mga migrant workers nga ila ginabig racist kag insensitive.
Sa Legislative Council session sa nasambit nga pungsod nagligad nga adlaw ginpahayag sang New People’s Party lawmaker Yung nga ang mga migrant workers ang nagatulog kag nagakaon sa mga public places nga ginatunaan sang “hygiene” issues.
Dugang pa sini nagatuga man ini sang sagabal sa adlaw-adlaw nga pangabuhi sang publiko kag sa mga operasyon sang mga shops sa palibot.
Ang pahayag ni Yung ang nagatuga sang pagpakamalaot sang nagkalain-lain nga worker’s group sa Hong Kong indi lamang mga Pilipino kundi mangin sa mga Indonesians, Sri Lankans, Thais kag Nepalese nga nagatrabaho man bilang mga domestic workers.
Sa report ni Bombo International Correspondent Murla Bunda, nahibaluan nga nagmartsa kaina sang aga ang nagkalain-lain nga grupo sang mga domestic worker’s padulong sa New People’s Party’s headquarters agud magdemand sang apology kay Yung.
Suno kay Bunda sa baylo nga sawayon sang lawmaker ang pagtiner sang mga migrant workers sa public places sa adlaw sang ila rest day kun Domingo dapat nga sabton na sang ila gobyerno ang paghatag sa ila sang lugar nga ila matineran nga madugay naman nila nga ginapangayo.
Magluwas diri, nagademand man ang mga ini nga iregulate sang gobyerno ang working hours sang mga migrant worker’s kag hatagan sang maayo nga benepisyo.
Suno naman kay Baning Mendez nga taga-Pangasinan, wala na gani ang iban sa ila ginahatagan sang maayo nga akomodasyon sang ila mga employers, idalok pa sa ila ang isa ka adlaw nga pagpahuway sa public places.
Samtang may nabaton man nga impormasyon ni Bunda nga nagtawag na si Yung kay Eman Villanueva sang Asian Migrants Coordinating Body, nga isa sa nagpamatok sa pahayag sang lawmaker nga indi sini hungod nga sakiton ang balatyagon sang mga migrant worker’s.
