Gin-istoryahan na sang Bacolod City government kag sang iban nga ahensya sang gobyerno kaupod ang mga airline companies ang mga protocol nga ipatuman sa tion nga magresume na ang commercial flights.
Kalakip sa mga nagtambong sa pagsinapol nga ginpatawag sang alkalde sa Bacolod City Government Center kahapon amo ang mga city officials, City Hall department and office heads, pinuno sang Department of the Interior and Local Government, Civil Aviation of the Philippines, kag mga tiglawas sang Philippine Airlines, Cebu Pacific, kag AirAsia.
Sa interview sang Bombo Radyo Bacolod kay Councilor Renecito Novero, chairman sang Quarantine Centers Action Team (QCAT), gindiskusyunan ang mga tikang nga pagaubrahon sang city kag provincial government agud makontrolar ang mga nagasulod sa probinsya kag mga posibilidad sa tion nga mag-umpisa na balik ang biyahe sang commercial flights.
Suno kay Novero, nagpahayag ang mga airline companies nga magapatigayon lamang sang isa ka flight kada adlaw apang aminado ini nga wala ini sang nakahibalo kun tubtob san-o ini nga himuon sang mga airline companies.
Ginalauman man sang mga airline companies nga indi man mapuno ang seating capacity sang eroplano bangud wala man sang mga kahiwatan sa probinsya nga makaengganyo sa mga tawo nga magpadulong sa probinsya sang Negros Occidental kag diri sa Bacolod City.
Ginpahayag man ni Novero nga mangabay man ang probinsya sa mga airline companies nga limitahan ang mga pasahero sa tres mil kada semana bangud amo lang ini ang maakomodar sang molecular laboratory sa isa ka semana.
Nagalaom man si Novero nga ugyunan sang mga pasahero kag airlines ang pagkuha sang medical certificate antes pasakyon kag may pirmahan nga pormas nga sa tion nga ini ang magpositibo sa swab test, siya ang iga-isolate.
Aminado man ini nga wala sang ikasarang ang syudad nga magswab test sang tanan nga nagapadulong sa ciudad kag probinsya gani ginahingyo ang kooperasyon sang tanan.
