Ginkumpirmar sang chairperson sang Action Team for non-OFW returning residents sa Bacolod City nga wala pa sang pagbag-o sa mga protocols natuhoy sa nagasulod kag nagagwa nga residente sa syudad sang Bacolod.
Ini apisar nga liwat nagpositibo sa virus ang isa ka Overseas Filipino Worker (OFW) nga natukiban nagpositibo sa Omicron variant, apisar nga ini ang recovered na sang magpauli sa syudad.
Suno kay Councilor Cindy Rojas, wala pa sang pagbag-o sa travel protocols kag nagapabilin sa gihapon sa Alert Level 2 status ang syudad sang Bacolod.
Paathag sini nga sa mga fully vaccinated individual nga magabyahe balik sa Bacolod City, nagapabilin nga vaccination card kag S-Pass lang ang ginapangita nga requirments.
Aminado naman si Rojas nga yara ang posibilidad nga maglain ang protocol inkaso maglala ang sitwasyon sang COVID-19 infection sa syudad.
Gani pahanumdom sini nga padayunon lang ang pagsunod sa minimum health protocols.
Suno sa konsehal, dapat nga maghalong gid ang tanan kag indi magkampante bangod yara na sa palibot ang Omicron.
Nagapati ini nga kun padayun nga mangin masinalundon ang mga pumuluyo sa syudad, indi naman magsaka ang kaso.
Panugyan man ni Rojas sa mga magapauli nga gikan sa Abroad kag Manila nga magsunod gid sa ginapatuman nga Quarantine protocols kag indi mangin complacent.
Paathag sang konsehal nga wala na ginasugat pa ang mga Bacolodnon sa pag-abot sa mga airport kag seaports, apang pasalig sini nga may team naman nga nahamtang sa lugar nga nagamonitor sa mga nagaabot nga pasahero.
Sa pahik nga bahin ginapakamaayo naman nga manubo ang threshold sang virus nga liwat nadetect sa OFW, gani indi na ini makalatun.
Ang asawa sini nga call center agent kag kaupod sini sa hotel isolation ang nagnegatibo naman sa RT-PCR test.
