Nagpasalig ang Provincial Administrator sang Negros Occidental nga ipatsekyar sini ang mga quarry site sa Northern Negros kun ini ang may kaangtanan sa nagluntad nga mga pagbaha.
Sa interview sang Bombo Radyo Bacolod kay Negros Occidental Provincial Administrator Atty. Rayfrando Diaz, family foodpacks lamang ang ginarequest sang mga naapektuhan sang nagluntad nga mga pagbaha kag ini ang ila man nga ginpadal-an.
Agud mas mangin preparado sa rescue operations, nagpadala ang provincial government sang Ondoy Boats nga human sa plastic gani malayo sa risgo nga magsungaw kun makabunggo sa mga matalom nga bagay, sa mga apektado nga local government units sa Northern Negros partikular na sa Victorias City.
Pasalig ni Diaz nga gilayon man nga nagasubside ang baha, apang ang ila nga labi nga ginakabalaka amo ang pagsugat-anay sang dako nga daludo sang tubig gikan sa mga suba sa taob.
Sa pihak nga bahin, may mga alegasyon naman nga ang quarry operation ang rasun sa nagluntad nga pagbaha sa Victorias City.
Suno kay Diaz, ipatsekyar sini sa Provincial Management Office kun ang quarry site ang nakasunod sa polisa nga dapat free flowing ang suba kag wala nagabalabag sa pag-ilig sang tubig ang ila nga excess materials.
Apang suno diri, ang una nga dapat magmonitor amo ang LGUs bangod sila ang may ikasarang gid nga magmando sang pagpalos sang natumpok nga mga materyales sa waterways.
Aminado ang provincial administrator nga wala nangin mahapos ang 2024 bangod madamo sang nag-antos sa nanarisari nga disasters kaangay sang El Niño, bagyo, baha kag pag-alburuto sang Bulkan Kanlaon.
Pasalig sini nga indi mag-untat ang provincial government sa pagbulig sa mga apektado nga pumuluyo.
Samtang kampante naman si Diaz nga duna na sa mga Negrense ang pagka-resilient kag wala naga-ampo sa mga pagpanghangkat.
