Gin-athag sang provincial administrator sang Negros Occidental nga wala naubos ang budget sang probinsya sa pag-supply sang pagkaon sa mga evacuees sang Bulkan Kanlaon.
Ini ang kasunod nga nag-untat na sila kahapon sa ila pagsupply sang pagkaon sa Community Kitchen.
Suno kay Provincial Administrator Rayfrando Diaz II, nakasugtan sang provincial government kag tatlo ka mga local government units nga ang probinsya anay ang magasupply sang pagkaon sa sulod sang 14 kaadlaw kag ini ang madinalag-on naman nga napatigayon sang probinsya.
Suno kay Diaz indi na ang probinsya ang magasupply sang pagkaon sabaylo ang mga local government units na ang magasupply sini samtang ang mga kagamitan kag ang manugluto sang pagkaon ang magapabilin sa mga community kitchen.
Ang mga LGUs sa karun ang may yara na sang pondo nga isuporta sa mga evacuees bangud bag-ong tuig na.
