Out patient na ang provincial director sang Negros Oriental Police Provincial Office kag tatlo ka iban pa nga kaupod sini nga natumba sa motorsiklo matapos nadulaan sang preno ang dump truck nga nagakarga sang graba sa Brgy. Rizal, San Carlos City, Negros Occidental kahapon sang hapon kun sa diin napatay ang hepe sang Guihulngan City Police Station.
Suno kay Police Lt. Roby Aurita, deputy chief sang San Carlos City Police Station, luwas na ang kahimtangan ni Police Col. Germano Mallari bangud menor lang nga bagras ang naagom sini.
Ang backrider naman sang hepe sang Guihulngan City Police Station nga si Police Lt. Col. Ruben Verbo ang nasaylo na sa ospital sa Dumaguete para sa dugang nga treatment sa fracture nga naagom.
Suno kay Aurita, live-in partner ni Verbo ang iya angkas.
Bangud nauna si Verbo sa lima tanan ka motorsiklo, siya gid ang nalab-ot sang truck samtang ikatatlo naman si Mallari.
Malayo naman ang antad sang duha ka motorsiklo nga nagasunod kay Mallari.
Nadala man nila pauli sa Negros Oriental ang mga motorsiklo bangud menor lang ang damage sini.
Ang team ni Mallari ang padulong kuntani sa Negros Occidental Police Provincial Office apang pag-abot sa likuon kag pataklad nga dalan, ila nga nasugata ang dump truck nga ginamaneho ni Wenny Boy Nagor, 24 anyos kag residente sang Barangay Kumaliskis, Salvador Benedicto.
Suno kay Nagor, wala naggana ang preno sang truck gani wala na niya ini nakontrol tubtub natumba.
