Nagaplano ang provincial director sang Negros Occidental Police Provincial Office (NOCPPO) nga magpatigayon sang dayalogo upod sa mga local government units (LGUs) sa Negros Occidental agud makapatuman sang mga programa nga makapanubo sang nagakatabo nga road accidents sa probinsya.
Suno kay NOCPPO Director Police Col. Leo Pamittan, natalupangdan niya nga sang damlag lamang nagadamo ang mga nagaluntad nga vehicular incidents sa probinsya pagbunggu-anay man ukon self-inflicted incidents.
Bangod sini, ginmando na niya sa mga chief of Police sa tagsa ka banwa kag ciudad nga magbutang sang mga Police personnels sa mga intersections ukon matawo nga mga dalanon.
Ginalantaw sini nga ang police visibility ang magaserbe nga paandam sa mga motorista nga maghinay sa pagpadalagan.
Plano man sini nga temporaryo nga himuon nga isa na lamang ka adlaw ang day-off sang mga personnel subong nga Desyembre agud mas madamo sang tawo nga mapalibot sa dalanon.
Sa pihak nga bahin, gin-athag ni Pamittan nga siya na mismo ang nagbuhat sang inisyatibo sa pagpakig-angot sa mga LGUs sa probinsya agud nga sila ang makahinun-anon kag makahimo sang mga programa nga makahatag sang dugang nga mga impormasyon sa “safe driving” sa mga motorista upod sa pila ka ahensya sang gobyerno kaangay sang Land Transportation Office (LTO) kag Department of Public Works and Highways (DPWH).
Paathag sini nga sa iya obserbasyon, tuman ka kulang ang mga warning signs nga makita sa mga highways.
Dugang pa ni Pamittan nga nagpanaog naman ini sang derektiba sa mga hepe sang kapulisan sa kada banwa kag ciudad sa probinsya natuhoy sa pagpaandam sa mga hauler truck drivers karun nga milling season sang tubo.
Suno diri, ang overloading ukon indi husto nga pagkarga sang tubo sa truck ang masami rasun sa pagkahulog sang mga tubo sa dalanon nga nagatuga ang unnecessary blockade nga kun indi matalupangdan sang motorista, mahimo magtuga sang disgrasya.
Kasubong man sa mga truck nga wala sang stop lights kag may madulom nga headlights.
