Nagpanawagan ang provincial director sang Negros Occidental Police Provincial Office sa mga pumuluyo nga nakakita sang pagtiro-patay sa isa ka police samtang nagajogging kaupod ang alkalde sa banwa sang Pontevedra, Negros Occidental kahapon nga makig-angot sa kapulisan agud nga mabuligan ang ginapatigayon nga imbestigasyon.
Madumduman nga patay ang intelligence officer sang Pontevedra Municipal Police Station matapos ginluthang samtang naga-jogging kaupod ang alkalde sa Reclamation Area, Barangay 1, Pontevedra, Negros Occidental alas-6:00 kahapon sang aga.
Ginkilala ang biktima kay P/Staff Sgt. Ildefonso Casugod kag residente sang amo nga banwa.
Sa interview sang Bombo Radyo kay Police Col. Romeo Palgue, nasubuan ini nga nadulaan sang kabuhi ang isa ka police personnel sa nasambit nga banwa sa pihak sang nagahilapit na ang pagsaulog sang paskwa kag bag-ong tuig.
Personal man ini nga nagpadulong sa banwa sang Pontevedra agud nga makighunan-anon sa alkalde kag hepe sang Pontevedra Municipal Police Station angot sa natabo nga krimen.
Ginapasiguro man sini nga mahatagan sang hustisya ang kamatayon sang police kag mahatag ang mga nagakaigo nga benepisyo sa mga nabilin nga pamilya sang biktima.
Ginatutukan sa karun sang Pontevedra Municipal Police Station ang tanan nga anggulo kag motibo sa pagpatay sa biktima agud masolbar ang kaso.
