Nagpatigayon sang meeting ang provincial election supervisor sang Negros Occidental sa mga partner agencies ilabi na sa security nga ginalakipan sang Philippine National Police kag Philippine Army bilang preparasyon sa May 9 elections.
Sa interview sang Bombo Radyo kay Atty. Roberto Salazar, ginpahibalo man sila sang pila ka mga aktibidades nga ginpatigayon sang communists-terrorists group sa probinsya apang nagpasalig man ang Armed Forces of the Philippines nga kontrolado man nila ang sitwasyon.
Ginpasiguro man sang nasambit nga ahensya sang gobyerno ang safe kag secure nga election sa Mayo 09, 2022 sa pihak sang mga nagaluntad nga mga encounters.
Ginapangabay man sang election officer nga mangin malinong kag matawhay ang pagpatigayon sang eleksyon sa probinsya sang Negros Occidental samtang nagpasalig man ang pinuno sang 303rd Infantry Brigade ang matawhay kag secure ilabi na ang adlaw sang piniliay.
Ginapanilagan man sang Comelec sa probinsya sang Negros Occidental ang development sa mga lugar nga yara sa orange category bangud may yara ang mga ini sang presensya sang NPA.
Ginatugyan na sang COMELEC sa security agencies ang pagmonitor sa mga politiko nga nagagamit sang private armed groups apang sa karun wala sila sang nabaton nga report angot diri.
Ginpahayag man ni Salazar nga ginatinguhaan sang COMELEC, AFP, PNP kag iban pa nga mga ahensya sang gobyerno nga ginhatagan sang election functions sang constitution nga mapatigayon ang matawhay kag malinong nga May 9 elections.
